(في آخر الصفحة ستجدون مقطع فيديو للوصفة من سنابي واضح فيها خطوات العمل )
السويسرول نوع من الكيك الإسفنجي اللذيذ المحشو بحشوات مختلفة أبسطها المربى
مايميز السويسرول هو توفر مقاديره عندنا وهي البيض والدقيق والسكر !
الأفضل البيض تطلعونه قبل بنصف ساعة من الشغل
الحشوات بإمكانكم تنوعون فيها
يعني ممكن مع المربى تضيفون كريمة جبن أو كريمة عادية أو قشطة أو كاسترد حسب رغبتكم
ممكن أيضا تضيفون فواكه طازجة بالحشوة
مايميز السويسرول أنه ممكن تحفظونه بالفريزر لمدة شهر تقريبا
♥أشكر أمي على الوصفة الرائعة ولاتنسونها من دعواتكم إذا طبقتوا الوصفة
المقادير:
٥ بيضات
٣/٤ كوب سكر
١ كوب دقيق (الأفضل الكويتي)
٢ملعقة شاي فانيليا
١ملعقة شاي خل
الطريقة:
يحمى الفرن على حرارة ٤٠٠فهرنهايت تعادل ٢٠٠ سيلزيوس
ندهن بالزبدة أو الزيت أو البخاخ صينية سويسرول أو أي صينية مستطيلة بمقاس ٢٨ في ٤٢ سم أو أقل ثم نغطي الصينية بورق الزبدة
نخفق البيض مع السكر والفانيليا والخل على سرعة عالية بخفاق الكيك لحد مايصير الخليط قريب للون الأبيض وشبه كريمي (تحتاجون وقت للخفق ٤-٨دقائق تقريبا حسب سرعة الخلاط)
نضيف الدقيق على دفعتين مع نخله خلال إضافته
وبعد كل دفعة نخلط خلط خفيف بالمضرب الكهربائي أو اليدوي أو السباتولا عشان نحافظ على الهواء اللي في الخليط وهذا السر اللي بيخليه إسفنجي
نصب الخليط في الصينية ونوزعه بالتساوي في الصينية
نخبزه لمدة تتراوح بين ١٢لـ١٤ دقيقة
نطلعها من الفرد ونتركها دقيقتين تخف الحرارة (لكن ماتبرد انتبهوا) لأن لو بردت بتتقطع باللف.
رشوا السطح سكر بودرة وغطوه بورق زبدة او شمعي أو منشفة مطبخ واقلبوا الصينية في صينية اكبر .
الان نزيل ورق الزبدة اللي خبزنا فيه ونزيله بحرص عشان ماتخرب علينا الكيكة أو تتقطع
نلف الكيكة لرول مع الاستعانة بالورق او المنشفة اللي وضعناها
نتركها تبرد وتاخذ شكل الرول مع الحرص على تغطيتها إذا كانت بالورق
تفتح من جديد وتدهن بالمربى وتلف نفس اللفة وتلف بمنشفة أو قصدير وعند التقديم ترش بالقليل من السكر البودرة وتقطع وبالعافية .
فيديو الوصفة